प्रतिनिधी | निळवंडी :- निळवंडी येथे २१ ऑक्टोबर २०२६ रोजी चाईल्ड सर्व्हायव्हल इंडिया, पर्नॉड रिकार्ड इंडिया फाऊंडेशन, ग्रामपंचायत निळवंडी, मानवता कॅन्सर हॉस्पिटल आणि इंडियन डेंटल असोसिएशन (IDA) , प्राथमिक आरोग्य केंद्र,निळवंडी यांच्या संयुक्त विद्यमाने मोफत दंत तपासणी व कर्करोग तपासणी शिबिराचे आयोजन करण्यात आले. प्राथमिक आरोग्य केंद्र, निळवंडी येथे आयोजित या शिबिरात एकूण **१३३ नागरिकांची आरोग्य तपासणी** करण्यात आली.
शिबिरात १०२ नागरिकांची दंत तपासणी करण्यात आली. यावेळी नागरिकांना मौखिक स्वच्छता, दातांची योग्य निगा राखणे आणि नियमित दंत तपासणीचे महत्त्व याबाबत मार्गदर्शन करण्यात आले. तसेच नागरिकांना मोफत औषधे, टूथपेस्ट आणि टूथब्रशचे वाटप करण्यात आले.
कर्करोग तपासणी शिबिरात ३१ ग्रामस्थांनी सहभाग नोंदवून तपासणी करून घेतली. यावेळी कर्करोग प्रतिबंध, आजाराचे लवकर निदान आणि वेळेत उपचार घेण्याचे महत्त्व याविषयी जनजागृती करण्यात आली. अशा तपासणी शिबिरांमुळे नागरिकांना आरोग्यविषयक सेवा स्थानिक पातळीवर उपलब्ध होण्यास मदत होते.
या शिबिराला प्राथमिक आरोग्य केंद्र, निळवंडीचे समुदाय आरोग्य अधिकारी डॉ. योगेश पाठक, सरपंच मनीषा चारोस्कर, चाईल्ड सर्व्हायव्हल इंडियाचे प्रोजेक्ट मॅनेजर जितेंद्र अहिरे, असिस्टंट प्रोजेक्ट मॅनेजर लिलाकर महाले, मेडिकल ऑफिसर डॉ. सिद्धार्थ गंगुर्डे, फार्मासिस्ट ऋषिकेश गावंडे, हेल्थ एज्युकेटर रोशन साळवे, प्रवीण बैरागी आणि पल्लवी चौधरी यांच्यासह आशा सेविका, आरोग्य सेविका, आरोग्य सेवक व शाळेतील शिक्षक उपस्थित होते.
या संयुक्त आरोग्य शिबिराच्या माध्यमातून दंत आरोग्य आणि कर्करोग तपासणीबाबत जनजागृती करण्यात आली. नागरिकांमध्ये प्रतिबंधात्मक आरोग्यसेवेविषयी जागरूकता वाढविणे आणि वेळेत तपासणी करून घेण्यास प्रोत्साहन देणे, हा या उपक्रमाचा महत्त्वाचा उद्देश होता.