या बैठकीत माजी आमदार धनराज महाले यांनी बोलताना सांगितले की, "उपमुख्यमंत्री एकनाथ शिंदे यांनी जनहिताचे अनेक निर्णय घेतले असून त्यांच्या नेतृत्वात अनेकजण शिवसेनेत काम करण्यास इच्छुक आहेत. त्यामुळे गटबाजी दूर करून पक्ष संघटना मजबूत करत सर्वांनी निवडणुकीच्या तयारीला लागावे." तसेच "महायुतीत लढायचं की नाही, याचा निर्णय पक्षश्रेष्ठी घेतील, मात्र प्रत्येक जागेसाठी सक्षम उमेदवारांची तयारी आतापासूनच हवी," असेही त्यांनी स्पष्ट केले.
बैठकीस संपर्कप्रमुख सुनील पाटील, जिल्हाध्यक्ष भाऊलाल तांबडे, जेष्ठ नेते सुरेश डोखळे, मविप्र संचालक प्रवीण नाना जाधव, तालुकाप्रमुख किशोर कदम, युवा सेना जिल्हाप्रमुख वैभव महाले, आदींसह अनेक पदाधिकारी व कार्यकर्ते उपस्थित होते.
गटबाजी व एकत्र येण्याची भावना
बैठकीदरम्यान काही कार्यकर्त्यांनी गटबाजीचे स्पष्ट उल्लेख करत, "शिवसेनेत अनेक इच्छुक कार्यकर्ते येऊ पाहत आहेत, मात्र वरच्या स्तरावरील एकजूट नसल्यामुळे स्थानिक पातळीवर पक्ष बळकट होत नाही," अशी खंत व्यक्त केली. काही कार्यकर्त्यांनी "तालुक्यात राष्ट्रवादीचे दोन गट एकत्र येऊ शकतात, तर शिवसेनेचे गट का नाही?" असा सवाल उपस्थित करत एकसंघतेची गरज अधोरेखित केली. मात्र पक्षीय नेत्यांनी या मुद्द्यावर भाष्य करण्याचे टाळून, सर्वांनी एकत्र येऊन पक्ष संघटना वाढवण्याचे आवाहन केले.
पदाधिकाऱ्यांवर नाराजीचा सूर
बैठकीत काही ज्येष्ठ कार्यकर्त्यांनी नाराजी व्यक्त करत सांगितले की, "पक्षात काही अयोग्य व्यक्तींना प्रवेश दिला जात आहे आणि कार्यक्षम ज्येष्ठ कार्यकर्त्यांना विश्वासात घेतले जात नाही." तसेच, "गावपातळीवर शाखा सुरु न झाल्याने संघटनात्मक बांधणी दुर्बल राहिली आहे," अशी टीका करण्यात आली. येत्या निवडणुकीत ही नाराजी कायम राहिल्यास पक्षाला फटका बसण्याची शक्यता कार्यकर्त्यांनी व्यक्त केली.
भविष्यासाठी एकजूट आवश्यक
आभारप्रदर्शन ज्येष्ठ नेते सुरेश डोखळे यांनी केले. बैठकीस मोठ्या संख्येने शिवसेना शिंदे गटाचे कार्यकर्ते उपस्थित होते. गटबाजी आणि नाराजीची छाया असली तरी आगामी निवडणुकांच्या पार्श्वभूमीवर पक्ष एकजुटीने लढेल का, हे पाहणे औत्सुक्याचे ठरेल.