ग्रामीण भागात धावणाऱ्या बहुतांश बस या अत्यंत नादुरुस्त अवस्थेत असल्याचा आरोप प्रवाशांकडून करण्यात येत आहे. बस रस्त्यातच बंद पडणे, वारंवार बिघाड होणे हे सुरगाणा तालुक्यात नित्याचेच झाले आहे. यामुळे प्रवाशांचा वेळ व पैसे वाया जात असून जीवितासही धोका निर्माण होत आहे.
तालुक्यातील ग्रामीण व आदिवासी भागातील नागरिकांसाठी एसटी हीच मुख्य वाहतूक व्यवस्था आहे. मात्र देखभाल-दुरुस्तीअभावी या बस सेवा विश्वासार्ह राहिलेल्या नाहीत. संबंधित अधिकाऱ्यांनी या गंभीर बाबीकडे लक्ष देऊन जुन्या व नादुरुस्त बसेस त्वरित बदलाव्यात तसेच सुरक्षित व नियमित बस सेवा उपलब्ध करून द्यावी, अशी जोरदार मागणी प्रवासी व नागरिकांकडून करण्यात येत आहे.