याबाबत सविस्तर वृत्त असे कि, कळवण खुर्द गावातील विठोबा गुलाब पवार हा तरुण दिनांक तीन ऑक्टोबर शुक्रवार सकाळी अकरा वाजेपासून बेपत्ता आहे. या तरुणाला गावातीलच एका शेतकऱ्याने मारहाण करून खून केल्याचा गंभीर आरोप संतप्त आदिवासी नागरिकांकडून करण्यात आला आहे. या प्रकरणात पोलिसांनी योग्य ती कारवाई केली नाही, अशी भावना समाजामध्ये पसरली असून याच्या निषेधार्थ शुक्रवार रात्री दहा वाजेपासून कळवण पोलीस ठाण्याच्या बाहेर रस्त्यावर बसून होते.
यामुळे जवळपास सोळा तास वाहतूक ठप्प झाल्याने परिसरातील जनजीवन विस्कळीत झाले होते. परिस्थिती हाताबाहेर जात असल्याचे लक्षात येताच अतिरिक्त पोलीस फौजफाटा तातडीने बोलावण्यात आला.
आज शनिवार सकाळी आदिवासी नागरिकांनी पोलीस ठाण्यासमोर रस्त्यावर ठिय्या मांडत आरोपींवर तातडीने गुन्हा दाखल करण्याची मागणी केली यास थोडा विलंब होत असल्याने संतप्त जमावाने पोलीस स्टेशन मध्ये घुसण्याचा प्रयत्न केला त्यावेळी पोलीस प्रशासनाने त्यास मज्जाव केला असता जमावाने मोठ्या प्रमाणात दगड फेक करण्यास सुरुवात केली या दगड फेकीत एक महिला पोलीस कर्मचारी व दैनिक देशदूत चे पत्रकार दिपक सोनवणे हे जखमी झाले आहेत. तसेच एका पोलीस वाहणाच्या काचा फोडण्यात आल्या आहेत. यामुळे काही काळ तणावाचे वातावरण पसरले होते. तरी कळवण तालुक्यात अशी घटना घडल्याची हि पहिलीच वेळ असून संतप्त जमावाने पोलीस कर्मचाऱ्यांना तब्बल दहा तास वेठीस धरले होते. शुक्रवारी रात्री पोलिसांनी सुरुवातीस मिसिंग केस दाखल केली होती परंतु जमावाने सदर आरोपींना आमच्या ताब्यात द्या अशी मागणी केल्याने तणाव निर्माण झाला होता.
आज सकाळपासून संतप्त नागरिकांनी अक्ट्रॉसिटी कायद्यान्वये गुन्हा दाखल करण्याची तसेच अपहरणाचा गुन्हा नोंदवण्याची मागणी केली होती. पीडित कुटुंबाला न्याय मिळावा, व आमचा मुलगा २४ तासात आम्हाला मिळावा अशा प्रकारच्या मागण्या केल्या त्या अनुषंगाने संबंधित शेतकरी पिता पुत्रावर अक्ट्रॉसिटी व अपहरणाचा गुन्हा दाखल करण्यात आला आहे.
या घटनेनंतर संपूर्ण कळवण तालुक्यात चर्चांना उधाण आले असून प्रशासनाकडून या प्रकरणाला गांभीर्याने घेतले जात असून पुढील तपास पोलीस उपअधीक्षक किरणकुमार सूर्यवंशी यांच्या मार्गदशनाखाली पोलीस निरीक्षक खगेंद्र टेंभेकर करीत आहेत.