फिरत्या जलचक्रीचा वाटप कार्यक्रम करण्यासाठी या आधीच डिक्सळ गावात वेल्स ऑन व्हील्स संस्थेचे नारायण गभाले यांनी भेट देऊन खरी वस्तुस्थितीची पाहणी केली होती. सर्व वस्तीला एकत्र करुन गावाच्या समस्या जाणून घेतल्या होत्या. गावाची पाहणी करुन गावाला जलचक्रीचे वाटप करण्याचे निश्चित करण्यात आले. जलचक्री वाटप करण्याचा प्रमुख उद्देश मुलींनी शिक्षण घेत असताना वेळ वाया जाऊ नये, गावातील महिलांना पाण्यासाठी पायपीट थांबली जावी म्हणून वेल्स ऑन व्हील्स या संस्थेच्या माध्यमातून डिक्सळ येथे फिरत्या जलचक्रीचे वाटप करण्यात आले. वाटपावेळी सर्व महिला वर्गाच्या तोंडावर स्मितहास्य होते, महिलांच्या चेहऱ्यावर वेगळाच आनंद पाहायला मिळाला. यावेळी वेल्स ऑन व्हील्स संस्थेचे नारायण गभाले, संकेत बिडगर, जलपरिषद मित्र नामदेव पाडवी, शरद पवार, सरपंच कमलेश वाघमारे, उपसरपंच संदीप चौधरी तसेच गावातील सर्व नागरिक उपस्थित होते. गावातील सर्व महिला वर्गाने उत्तम नियोजन करत सहभाग घेतला.
--
या अगोदर दुरवर जाऊन, भटकंती करत डोक्यावर हंडा घेऊन पाणी आणण्यासाठी जात होते त्यामुळे आमच्या गावात महिलांना कंबरदुखी, गुडघेदुखी, मणक्याचा त्रास आदीसह आजारांचा सामना करावा लागत होता. परंतु या संस्थेने आमच्या गावात येऊन परिस्थिती बघून आम्हाला फिरत्या जलचक्री देऊन मदत केल्याने आम्ही सर्व गावातील महिला वेल्स ऑन व्हील्स या संस्थेचे आभार मानतो.
-: विमल गावंडे,डिक्सळ
उन्हाळ्यात आमच्या गावाला भीषण पाणी टंचाई जाणवत असते. या वेळेस आम्हाला रात्री दूर दूरवर जंगलात झऱ्यावर पाणी शोधायला जावे लागते. यामुळे डोक्यावर हांडे घेऊन पाणी आणणे अवघड होते. यामुळे आमचे शारीरिक श्रम वाचतील माझ्या मुलींना डोक्यावर पाणी आणावे लागते. व्हील ड्रम मुळे वेळ वाचेल.
-: ममताबाई वाघमारे, डिक्सळ